ಸಿದ್ದಾಪುರದಲ್ಲಿ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ ಆಚರಣೆ.

ಸಿದ್ದಾಪುರ (Times Of Coorg) : ಶ್ರೀ ನಾರಾಯಣ ಗುರು ಧರ್ಮ ಪರಿಪಾಲನಾ (ಎಸ್.ಎನ್.ಡಿ.ಪಿ) ಯೋಗಂ ಕೊಡಗು ಯೂನಿಯನ್ ವತಿಯಿಂದ  166ನೇ ಬ್ರಹ್ಮರ್ಷಿ  ನಾರಾಯಣ ಗುರು ಜಯಂತಿಯನ್ನು ಸಮಾಜಿಕ ಅಂತರ ಕಾಯ್ದುಕೊಂಡು  ಸರಳ ರೀತಿಯಲ್ಲಿ ಆಚರಿಸಲಾಯಿತು.

. ಸಿದ್ದಾಪುರದಲ್ಲಿ ಶ್ರೀ  ನಾರಾಯಣ ಗುರು ಎಸ್  ಎನ್ ಡಿ ಪಿ ಯೂನಿಯನ್ ಕಟ್ಟಡದ ಸಭಾಂಗಣದಲ್ಲಿ   ಕಾಫಿ ಬೆಳೆಗಾರ ಕೆ.ಆರ್. ರಾಜನ್ ಧ್ವಜಾರೋಹಣ ನೆರವೇರಿಸಿದರು ,

  ಬೆಳೆಗಾರ ಕಂಬಿಬಾಣೆಯ ಟಿ.ಕೆ.ಸಾಯಿಕುಮಾರ್ ಸಭಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ ಶ್ರೀ ನಾರಾಯಣ ಗುರುಗಳ ಆದರ್ಶಗಳನ್ನು ಪಾಲಿಸಿಕೊಂಡು ಸಂಘಟನೆಯ ಬಲವರ್ಧನೆಗಾಗಿ ಎಲ್ಲರೂ ಸಂಘಟಿತರಾಗಿ ಶಿಕ್ಷಣದ ಮೂಲಕ ಸಮಾಜದ ಮುಖ್ಯವಾಹಿನಿಗೆ ಬರಬೇಕೆಂದು ಹೇಳಿದರು.

ಎಸ್.ಎನ್.ಡಿ.ಪಿ. ಯೋಗಂ  ಯೂನಿಯನ್‍ ಜಿಲ್ಲಾಧ್ಯಕ್ಷ ವಿ.ಕೆ ಲೋಕೇಶ್ ಅಧ್ಯಕ್ಷತೆ ವಹಿಸಿ ಮಾತನಾಡಿ ಕೊರೊನಾ ವೈರಸ್ ನಿಂದ ಸಂಕಷ್ಟಕ್ಕೊಳಗಾಗಿರುವ ಜನರು ಹಲವು ಸಮಸ್ಯೆಗಳನ್ನು ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ ಶ್ರೀ ನಾರಾಯಣ ಗುರು ಜಯಂತಿಯನ್ನು ಸಾಮಾಜಿಕ ಅಂತರ
 ಕಾಯ್ದುಕೊಂಡು ಸರಳವಾಗಿ ಆಚರಣೆ ಮಾಡಲಾಗಿದೆ.

ಸಂಘಟನೆಯ ಬಲವರ್ಧನೆಗೆ ಬಾಂಧವರು ಹೆಚ್ಚಿನ ರೀತಿಯಲ್ಲಿ ಸಹಕಾರ ನೀಡುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯದ ಶಿವಮೊಗ್ಗ, ದಕ್ಷಿಣ ಕನ್ನಡ, ಮೈಸೂರು ಸೇರಿದಂತೆ ವಿವಿಧ ಜಿಲ್ಲೆಗಳಲ್ಲಿ 50ಕ್ಕೊ ಹೆಚ್ಚು ಶಾಖೆಗಳನ್ನು ಹೊಂದಿದ್ದು  ಸಾವಿರಾರು ಮಂದಿ ಸಂಘಟನೆಯೊಂದಿಗೆ ಕೈಜೋಡಿಸಿದ್ದಾರೆ .

.ಕೊಡಗು ಜಿಲ್ಲೆಯಲ್ಲೂ ಸಂಘಟನೆ ವಿವಿಧ  ಶಾಖೆಗಳಲ್ಲಿ ಸುಮಾರು ಹದಿನೆಂಟು ಸಾವಿರ ಮಂದಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದು.ಮುಂದಿನ ದಿನಗಳಲ್ಲಿ ಐವತ್ತು ಸಾವಿರ ಮಂದಿಯನ್ನು ಸೇರ್ಪಡೆಗೊಳಿಸುವ ನಿಟ್ಟಿನಲ್ಲಿ ಸಂಘಟನೆ ಮುಂದಾಗಿದೆ.  ಪ್ರತಿ ವರ್ಷದಂತೆ ಈ ವರ್ಷವೂ ಎಸ್ ಎಸ್ ಎಲ್ ಸಿ ಹಾಗೂ ಪಿ ಯು ಸಿ ಪರೀಕ್ಷೆಯಲ್ಲಿ   ಅತಿ ಹೆಚ್ಚು ಅಂಕ ಗಳಿಸಿದ 15 ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಿ ಗೌರವಿಸಲಾಗಿದೆ.

ಜಿಲ್ಲೆಯ ಎಲ್ಲಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲೂ ಶ್ರೀ ನಾರಾಯಣ ಗುರುಗಳ ಶಾಖೆಗಳನ್ನು ಪ್ರಾರಂಭ ಮಾಡಲು ಗುರಿ ಹೊಂದಿದ್ದು .ಶ್ರೀ ನಾರಾಯಣ ಗುರುಗಳ ಆದರ್ಶಗಳನ್ನು ಪಾಲಿಸಿಕೊಂಡು ಶಿಕ್ಷಣಕ್ಕೆ ಹೆಚ್ಚು ಒತ್ತು ನೀಡುವ ಮೂಲಕ ವಿದ್ಯಾರ್ಥಿಗಳನ್ನು ಪ್ರೋತ್ಸಹಿಸುವ ನಿಟ್ಟಿನಲ್ಲಿ ಸಮಾಜದ ಮುಖ್ಯವಾಹಿನಿಗೆ ತರಲು ಸಂಘಟನೆ ಮುಂದಾಗಿದೆ ಎಂದರು

.ಈ ಸಂದರ್ಭಜಿಲ್ಲೆಯ ವಿವಿಧ ಭಾಗಗಳಲ್ಲಿ ಸಂಘಟನೆಗಾಗಿ ಶ್ರಮಿಸಿದ ಯೂನಿಯನ್‍ನ ಮಾಜಿ ಉಪಾಧ್ಯಕ್ಷ ಪಿ.ಕೆ. ಶ್ರೀಧರನ್, ಟಿ.ಆರ್. ಸೋಮನಾಥ್, ಪಿ.ಎನ್. ಸಹದೇವನ್, ನಿರ್ದೆಶಕರಾದ ಇ.ಎನ್. ಭರತ್‍ಕುಮಾರ್, ಟಿ.ಕೆ. ಸೋಮನ್, ಪಿ.ಎನ್. ಸುಕುಮಾರ, ಹಿರಿಯರಾದ ಪಿ.ಎನ್.  ವಿಜಯಕುಮಾರ್, ಮಾಲ್ದಾರೆ ಎಸ್.ಎನ್.ಡಿ.ಪಿ. ಶಾಖೆಯ ಅಧ್ಯಕ್ಷ ಕೆ.ಎ. ಕುಟ್ಟಪ್ಪನ್, ಸುಳುಗೋಡು ಶಾಖೆಯ ಅಧ್ಯಕ್ಷ ಎನ್. ಗೋಪಾಲನ್, ಗೋಣಿಕೊಪ್ಪ ಶಾಖೆಯ ಕೆ.ಜೆ. ಜಯೇಂದ್ರನ್ ಅವರನ್ನು ಸನ್ಮಾನಿಸಿ ಗೌರವಿಸಲಾಯಿತು .  ಲೇಖಕಿ  ಕಾನತ್ತಿಲ್ ರಾಣಿ ಅರುಣ್ ಬರೆದಿರುವ  ಸಾಮಾಜಿಕ ಮತ್ತು ಧಾರ್ಮಿಕ ಪರಿವರ್ತನೆಯ ಹರಿಕಾರ ಯುಗ ಪುರುಷ, ಬ್ರಹ್ಮರ್ಷಿ ನಾರಾಯಣ ಗುರುಗಳ ಜೀವನ ಸಂದೇಶ ಎಂಬ "ಮಹಾಗುರು"ಪುಸ್ತಕವನ್ನು ಗಣ್ಯರು ಲೋಕಾರ್ಪಣೆ ಮಾಡಿದರು.ಯೂನಿಯನ್‍ನ ಜಿಲ್ಲಾ ಉಪಾಧ್ಯಕ್ಷ  ಆರ್.ರಾಜನ್ ,ಕಾರ್ಯದರ್ಶಿ ಎಂ.ಪಿ.ಶಿವಪ್ರಸಾದ್, ಪ್ರಮುಖರಾದ ರಾಜೇಂದ್ರ ಬಾಬು, ಪ್ರೇಮಾನಂದ,ದಾಮೋದರ,ನಾರಾಯಣ' ಸತೀಶ್,ರಾಜಶೇಖರ್ ಸೇರಿದಂತೆ ಮತ್ತಿತರರು ಉಪಸ್ಥಿತರಿದ್ದರು .